sa tagal ng panahong
hindi tayo nag-usap,
hanggang ngayon pa rin ba
wala ka pa ring pakialam?

mga mata mo’y malayo
kung tumingin, animo’y diretso
ngunit hindi mo ako nakitang
nag-aabang sa harapan mo.

kailanma’y di mo naramdaman
ang presensiya ko sa tabi mo;
ni hindi ka nga kumurap
noong ako’y umalis at nagpakalayo.

ang tagal ng panahon
ngunit di ka pa rin nagbago.
isipan mo’y nanatiling nakakahon
wala nang dahilan para umasa pa ako.

dahil ang mga mata mo’y diretso,
sa akin lumulusot ang tingin mo.
wala namang epekto kung aalis ako,
di mo mararamdamang wala na ako.